ఆరోగ్యానికి భద్రత
ముట్టుకుంటే ముప్పేట దాడే
* ఏటీఎం కీబోర్డులు.. కరెన్సీ నోట్లు.. తలుపు గొళ్లేలు..స్విచ్చులు వంటివన్నీ బ్యాక్టీరియా చేరే ప్రదేశాలే.
* కరెన్సీ నోట్లపై దాదాపు 78 రకాల రోగక్రిములు ఉన్నట్లు ఒక పరిశోధన సంస్థ గతంలో వెల్లడించింది.
* అరచేతిలో స్వర్గంగా భావిస్తున్న మొబైల్‌ ఫోన్లపై ఉన్న అనేక రకాలైన బ్యాక్టీరియా ఆరోగ్యాన్ని హరిస్తోందని నిపుణులు పేర్కొంటున్నారు.
క్రిముల ఆవాసాలు..
నిత్యం చేతులు శుభ్రంగా కడగకపోతే అనేక రోగకారక క్రిములు శరీరంలోకి వెళ్లే ప్రమాదముందని ఒక పరిశోధనలో తేలింది. ప్రధానంగా తలుపులు తీసే సమయంలో గొళ్లేలు, బహిరంగ ప్రదేశాలు, పుస్తకాలు, కార్యాలయాలు, ఏటీఎంలు, లిప్టు స్విచ్చులు, గోడలు చేతులకు ఆనుకున్నప్పుడు, కరెన్సీ నోట్లు లెక్కించినప్పుడు వివిధ రకాల బ్యాక్టీరియా చేతులకు అంటుకుంటుంది. మట్టిలో ఆడుకునే పిల్లలపై వీటి ప్రభావం ఇంకా ఎక్కువగా ఉంటుంది. పల్లెప్రాంతాల్లో ప్రజలు కాయకష్టం చేస్తారు. అవగాహన లేకపోవడం వల్ల హడావుడిగా వచ్చి ఆహారం తీసుకుంటుంటారు. ఇది అనారోగ్యానికి కారణమవుతోంది. పాఠశాలల విద్యార్థులు కూడా ఆటపాటల్లో మునిగిపోయి తగిన జాగ్రత్తలు తీసుకోరు. ఈ విషయాన్ని గుర్తించిన ప్రభుత్వం పాఠశాలల్లో చేతులు శుభ్రతకు ప్రాధాన్యత ఇచ్చింది. మధ్యాహ్న భోజనం చేసేముందు పాఠశాలల్లో సబ్బు ఏర్పాటుచేసి చేతులు పరిశుభ్రత కార్యక్రమాన్ని నిర్వహిస్తోంది.
వ్యాధులు ఇలా..
నిత్యం మనం వినియోగించే వస్తువులపై క్రిములు ఎక్కువగా ఉంటే కొన్ని రోగాలు కొని తెచ్చుకుంటాం. ప్రధానంగా ఈ వస్తువులపై ఇన్‌ఫ్లూయెంజా వైరస్‌, హెపటైటిస్‌ ఏ, బీ, సీ, డీతో పాటు హెర్పిస్‌, ఎడినో తదితర రకాలకు చెందిన రోగకారక క్రిములు ఆవాసం ఉంటాయి. వీటి ద్వారా వివిధ రకాల జ్వరాలు, రక్తకణాల తగ్గుదల, డయేరియా వంటి ఆరోగ్య సమస్యలొస్తాయి.
చేతులు శుభ్రత తప్పనిసరి..
వ్యాధులు సోకకుండా ఉండాలంటే చేతుల శుభ్రత తప్పనిసరి. చేతులు అపరిశుభ్రంగా ఉండటం వల్ల మలేరియా, టైఫాయిడ్‌ వంటి వ్యాధులు సోకుతాయి. ప్రజలు వ్యక్తిగత పరిశుభ్రత పాటించేందుకు అవగాహన కల్పించాలి. చిన్ననాటి నుంచే అవగాహన కల్పించాలి.
* చేతులు నీళ్లతో బాగా తడుపుకొని, తగినంత సబ్బుని తీసుకోవాలి.
* రెండు అరచేతులను కలిపి బాగా రుద్దాలి.
* కుడి అరచేయితో ఎడుమ చేయి వెనుక భాగం, అదే విధంగా ఎడమ అరచేయితో కుడిచేయి వెనుకభాగం బాగా రుద్దాలి.
* రెండు చేతివేళ్లను ఒక దానిలోనికి ఒకటి చొప్పించి రుద్దాలి.
* ఎడమ చేతి వేళ్లను ముడిచి, కుడి అరచేయిలో, అదే విధంగా కుడిచేయి వేళ్లను ముడిచి ఎడమ అరచేయిలో రుద్దాలి.
* ప్రతి బొటన వేలును మరొక చేతితో చుట్టి రుద్దాలి.
* ప్రతి అరచేయిని మరో చేయి మునివేళ్లతో రుద్దాలి.
* సబ్బుతో చేతులు కడుక్కోవడం చాలా కీలకం.
* వారానికోసారి గోళ్లను కత్తిరించుకోవాలి.
0 thoughts on “చేతుల శుభ్రత.. ఆరోగ్యానికి భద్రత”